ትንሽ ነው ይሉኛል — አይረባም ይሉኛል
ግብሬን አሳንሰው
ሊገዛህ ሲመጣ — ማጣጣል ወጉ ነው
መቼም የዛሬ ሰው
ጊዜ የሰቀለውን — ሻጩ እስኪቀንሰው
ወትሮም በገዢ ነው — ማጣጣል ሚብሰው
* * *
ገዢ ሲያሳንሰኝ — ሻጭ ሲያቆላምጠኝ
ዋናው ማንነቴ — በትርፍ አመለጠኝ
ገዢ እያራከሰ — ሻጭ እያስወደደሽ
በድርድር መሀል
በክርክር መሀል
ውሸት አስለመደሽ
* * *
አድርባይ ደላላሽ
ዳተኛው ደላላሽ — ለእውነት የለገመ
ሲያስሸጥሽ ይውላል
ሲያስገዛሽ ይውላል — እየደጋገመ
ለገዥ አስረክሶ — ለሻጭ ያስወድዳል
ደላላ ክፉ ነው — ከሁሉም ይለምዳል
ከሁሉም ይወስዳል

ላንተ ግን ልንገርህ
ጊዜ የጣለን እንጂ — ስላይደለን ጀንፈል
ገዢም ሻጭም — ሆነህ የደላላ አትክፈል
ቀኑ ሲጨላልም
ዝምድና — ከልክሎት
ግርግር — ከልሎት
አልታወቅ ብሎ
ስለጠፋባቸው — የግብይት ውሉ
በዘመድ ዋጋ ነው
ሲሸጡን አርፍደው — ሲገዙን የዋሉ

የገዢ ክርክር — ሻጩ ላይ ሳይተጋ
የሻጭ አማችነት — ገዢን ሳይዋጋ
እየገዙን አሉ
እየሸጡን አሉ
ቀን በጣለው ዋጋ