(መነሻ ሃሳብ- የጁኖ ዲያዝ ‹ዘ ቺተርስ ጋይድ ቱ ላቭ›› አጭር ልቦለድ)

ሰው ሁሉ ‹‹ፀዲና ሙሌማ ይጋባሉ። ተጋብተው አራት ልጅ ይወልዳሉ። አብረው ያረጃሉ። ተለያይተው መኖር ስለማይችሉ አንዳቸው ከሞቱ በነጋታው ሌላኛቸው ይከተላሉ›› የምንባል አይነት ነበርን። እኔና ፀዲ። ከተለያየን ሁለት ወራት ሞላን።

መጀመሪያ መለያየታችንን መቀበል እምቢ አልኩ። ( ለመንኳት። አስለመንኳት። አስገዘትኳት። አብረን በነበርን ጊዜ ቅር የሚላትን፣ የሚያበሳጫትን ሁሉ ተውኩ። የሚያስደስታትን ሁሉ አደረግኩ። እንደ …በሌሊት ተነስቼ ስራዋ ድረስ መሸነት። ቅዳሜ ቅዳሜ ጓደኞቼን ትቼ ከእሷ ጋር ስንዘላዘል መዋል። መፅሃፍ ቅዱስን ከመጀመሪያው እስከመጨረሻው ማንበብ። መፅሃፍ ቅዱስን በየቦታው መጥቀስ። በየቀኑ ማስቀደስ ። የማትወዳቸው ሰዎች እንዳይደውሉልኝ ስልክ ቁጥሬን መቀየር። የስልኬን ፓስወርድ መስጠት። የፌስቡክ ፓስወርዴን የእሷን ስምና ስልክ ማድረግ። መጠጣት ማቆም። ማጨስ ማቆም። መቃም ማቆም። ከእሷ ጋር ባልተገናኘ ሁኔታ ደስ የሚለኝን ሁሉ መተው። በአጠቃላይ በእሷ ብቻ መደሰት። በእሷ ፈቃድ ብቻ መላወስ። በእሷ ቀልድ ብቻ መሳቅ። በእሷ ዛቢያ ብቻ መሽከርከር።)

ግን አልሆነም።

ጥላኝ ሄደች።

ከዚያ ደግሞ አያዝኑ አስተዛዘን አዘንኩ። ( ቢጃማ አድርጎ ለቀናት ከቤት ያለመውጣት አይነት ሃዘን። ቀኑን ሙሉ ለምግብ ብቻ እያቆሙ ማልቀስ አይነት ሃዘን። ሰውን ሁሉ መጥላት አይነት ሃዘን። ሰውን ሁሉ መፍራት አይነት ሃዘን። በየቀኑ ራስን ሲጥ አድርጎ ስለመግደል ማሰብ፣ በየሰአቱ ከፎቅ ተፈጥፍጦ ስለመሞት ማሰላሰል አይነት ሃዘን። ምናለ ድንገት ሞቼ ባደርኩ…ምናለ እዚህ ፍራሽ ላይ ውሃ ሆኜ በሰረግኩ፣ ምናለ እዚህ ወለል ላይ አቧራ ሆኜ በመጥረጊያ ተጠርጌ በወጣሁ ብሎ መመኘት አይነት ሃዘን )

ከተለያዩ ይሞታሉ ቢሉንም ይሄው፣ ሁለታችንም አልሞትንም።

አሁን ደግሞ፣ ከዚያ ሁሉ ልመና እና ምልጃ በኋላ፣ ከዚያ ሁሉ መሰባበርና መበጣጠስ በኋላ….እዚህ ጥላው የሄደችው ቤት ውስጥ ብቻዬን ቁጭ ብዬ ደህና ደህና ነገሯን ሳይሆን ውሰጥ ውስጡን ያስጠሉኝ ስለነበሩ ነገሮቿ አስባለሁ።

ጓደኛዬ ክብሮም ያዘዘልኝ መድሃኒት ነው።

ክብሮም ስለመለያየት ብዙ ያውቃል። ብዙዎቹ ገርልፍሬንዶቹ አንድም ልደት አብረውት አክብረው አያውቁም። እንቁጣጣሽ ላይ ጀምረው የጥቅምት እሸት ሳይበላ ይቀየራሉ። ለቅበላ ተዋውቀው ሁዳዴ መሃል ይለያያሉ። ስለዚህ የወደዳትን የመራቅ፣ የመለየት ጥበብን ቀቅሎ በልቶታል እና መከረኝ።

ምን ብሎ መከረኝ? የጓደኝነቴን ልምከርህ። አትደውልላት። አታስባት። ብታስባት እንኳን አብራችሁ እያላችሁ ያስጠላህ የነበሩትን ነገሮች ብቻ አስብ። መጥፎ መጥፎውን ብቻ…ገባህ? ለምሳሌ ፣ ምኗ ይደብርህ ነበር? ምኗ ያስጠላህ ነበር? ባትነግራትም ምኗ ያናድድህ ነበር…እያለ ፀዲን ከፊተኛው ሕይወቴ የማባረርበትን ጥበብ አቀበለኝ። ስለዚህ አሁን እዚህ ቁጭ ብዬ አብረን ባለን ጊዜ ቅር፣ ሲዘልም ቅፍፍ ይሉኝ የነበሩ ባህሪዎቿን፣ ሁኔታዎቿን፣ ግሳንግስ- ጓዞቿን፣ ማሰብ ጀምሬያለሁ።

….አለ አይደል….እንደዛ የቺቺኒያ ሴት አዳሪ የሚያስመስላት ክምር ብሎንድ አስጠሊታ ሂውማንሄሯ። ምግብ ስታላምጥ በነጠላ ጫማ የምትሮጥ እስከሚመስል ጧ ጧ እያደረገች የምታስጮኸው ነገር። ታይት ስትለብስ ሶስተኛ እግር ሊያስገባ የሚችል ክፍተት የሚተዉት ቀጫጫ ብራኬት እግሮቿ። ምላሷ ላይ ያሉት መአት ጥቁር ጠቃጠቆዎች።

(ክብሮም እውነቱን ነው….ይሄ ነገር ሳይሰራ አይቀርም )

…እንደ….ሸራተን በወሰድኳት ቁጥር ብርቅ እየሰራባት የሚያስጠጣኝ፣ የሚያሳፍረኝ ገጠሬነቷ ። ነዝናዛ እናቷ። ቆንጆ ግን ነገረኛ እህቷ። አንድም ቀን ጥሞኝ የማያውቅ ሽሮዋ። ሆዳም ጓደኞቿ። እንግሊዝኛ አለመቻሏ። እንግሊዝኛ ባለመቻሏ ፊልም ባየን ቁጥር ምን አላት…ምን አለው…ምንድናቸው…ምኗ ነው እያለች መጨቅጨቋ።

(ክብሮም ጥሩ ጓደኛዬ ነው። መድሃኒቱም ፍቱን ነው)

ከዲፕሎማ ያልዘለለው የትምህርት ደረጃዋ። ምን ብር ብታፈስበት ሰው ፊት የሚያስቀርብ ልብስ መርጣ መግዛት አለመቻሏ። ስስማት የምታሰማው ደስ የማይል እህ…..፣ ፍቅር ስንሰራ እስቲ ከላይ ሁኚ ስላት ‹‹ሂደደዛ….ሴተኛ አዳሪ አረግከኝ…!›› እንዴ የምትለው ፋራነቷ። አታጭስ ማለቷ። አትጠጣ ማለቷ። አትቃም ማለቷ። በመሸ ቁጥር ስልኬን መበርበሯ። ሴት ጓደኛ እንዳይኖረኝ በስልት መከልከሏ።

(ምን ሆኜ ነበር እወዳት የነበረው?)

ለእነዚያ ማያልፍላቸው አመዳም ቤተሰቦቿ ገንዘቤን ሳታባራ መበተኗ። ሚጢጢ ደሞዟ ለቀጫጫ እግሯ ከሚሆን ሎሽን በላይ ምንም ነገር መግዛት አለመቻሏ። ለመዝናናት ከገዳም ውጪ አለመምረጧ። ደህና ሬስቶራንት ስወስዳት በሹካና በቢላ እንደመብላት ስቴክ እንደ አጥንት አንስታ መጋጧ። ስልክ ሲደወልላት በሄሎ ፋንታ ሃሎ ማለቷ።

(ክብሮም አስማተኛ ነው። በአንድ ጊዜ ከደም ስሬ የወጣች፣ ከቤቴ የተነነች፣ ከሕይወቴ የጠፋች…ላትመለስ የተባረረች መሰለኝ…)

ለክብሮም ደወዬ ቢራ ካልጋበዝኩህ ሞቼ እገኛለሁ አልኩ። እየፈነደቀ እሺ አለኝ።

ተነሳሁና ልብስ ልቀይር ወደ ቁምሳጥኑ ሄድኩ።

ከፈትኩት።

ከትርምሱ መሃል ፀዲ ከእድሜህ ጋር አይሄድም አትልበሰው ብላ ከልክላኝ የተውኩትን መበታተን የጀመረ ጂንስ ጎርጉሬ ሳወጣ የረሳችውን ልብሷን አገኘሁት።

ነጭ ረጅም ብዙ ቀያይ አበቦች የፈሰሱበት ቀሚሷ።
ታይላንድ ስሄድ ምን ላምጣልሽ ስላት ለቤተክርስትያን የሚሆን ረጅም ቀሚስ ብላኝ ያመጣሁላት ቀሚሷ።
ቤተክርስትያን ስትሄድ የምታዘወትረው ቀሚሷ። ከቤተክርስትያን መልስ ቡና ስታፈላልኝ የምትለብሰው ቀሚሷ።

ይሄን ቀሚስ ለብሳ ቤቱን በዚያ ውብ ሳቋና ግሩም ቡናዋ የምታደምቀው ነገር ትዝ አለኝ።
ይሄን ቀሚስ ለብሳ የማይጣፍጥ ሽሮዋን ካልበላህ ብላ ፊቴን በፍቅር እየዳበሰች፣ አይኖቼን እየሳመች የምታባብለኝ ውል አለኝ።
ይሄን ቀሚስ ለብሳ ውላ ማታ ልንተኛ ስል ራሷ መክፈት እየቻለች ና ዚፑን ክፈትልኝ ብላ ለአልጋ ላይ ድግስ ሰበብ የምትፈጥረው ነገር ትውስ አለኝ።

ረስታው ነው?

እጆቼ ያለፈቃዴ አነሱት።

አሸተትኩት።

ፀዲ ፀዲን ይላል።

ደግሜ አሸተትኩት።

ሳልሰርግ ያገባኋትን፣ ግን ደግሞ ያጣኋትን የዋኋን ፀዲን፣ ፍቅሬን ፍቅሬን ይላል።

ፀዲዬ….
ፀዲ….
አንቺ ፀዲ…..

ቀሚሱን እንደያዝኩ፣ ቁምሳጥኑ አጠገብ ቆሜ እንደ ህጻን ንፍርቅ ብዬ አለቀስኩ።