በመጨረሻም ራሴን ላጠፋ ነው። ቃሉ ራሱ ደስ ሲል! ራስን ማጥፋት!! ፓለቲከኞች “የራስን ዕድል በራስ መወሰን ” እንደሚሉት ነው።

ከህይወት ምን ቀረኝ? ምንም! አንድ የቀረኝ ነገር ራሴን የማጥፋት ድርጊት ብቻ ነው። ከዛ በኋላ ሀገሬ ሞት ነው። ከሞት ግድግዳ ወዲህ ምንም የሚጎትተኝ ነገር አይኖርም። ከሞት በኋላ ምን እንዳለ አላውቅም። አለማወቄ ያጓጓኛል እንጂ አያስፈራኝም።

ደስ ይለኛል። በጣም ደስ ይለኛል። የሆነ የማላውቀው ማራኪ ስሜት ውስጤ ይፈሳል። መንፈሴ ዝግጁ ነው። ደውሉ ሲደወል ይሰማኛል። ለኔ እንደሚደወል አውቃለሁ። በደውሉ መደወል ላይ ድርሻ አለኝ። ሞት ላይ የገዛ ፍቃድን ከማሳረፍ በላይ ምን ደስታ አለ?

ሰማይ ቤት፣
” ነብሱን የምቀበለው እኔ ነኝ፣ አይደለም እኔ ነኝ ” በሚል አለመግባባት፤ መላዕክት ሲከራከሩ ይታሰበኛል። በገዛ ፍቃዴ ስለምሞት መላዕከ ሞት በኔ ላይ ስልጣን አልተሰጠውም። በዚህ የተከፋ መላዕከ ሞት ይታሰበኛል።

መላዕክት በገዛ ፈቃዱ ወደነሱ መንደር ሊቀላቀል የወደደ ሰው ሲያገኙ ይደሰታሉ። ደስታቸው ይታሰበኛል። ዝግጅቴን ጨርሻለሁ። ጥቂት ቆይታ ብቻ!

ሞት ማራኪ ሆኖ ይታየኛል። ፈጣሪ ሰዎችን ለማዳን ብሎ ከሰማይ ወርዶ ሞተ ሲሉኝ፣
በልቤ “አይደለም ወደ ምድር የወረደውም፣ የተሰቀለውም ሞት ማርኮት ነው” ብያለሁ።

“ሰማይ ቤት ሞት ስለሌለ ሞትን ለማየት ጓግቶ ነው የመጣው ” ብያለሁ።
ይቅር ይበለኝ!! በማይበርደው ምህረቱ ይቅር ይበለኝ። ሄጄም ተጨማሪ ይቅርታዬን እጠይቃለሁ።
ሞት ይማርከኛል።

ከሞት ወዲህ ምን ቀረኝ? እርግጥ ነው የባለ ሱቁ አንዋር ያልተከፈለ ዕዳ አለብኝ። እሱ “የቀረኝ” ውስጥ ይገባል? ይሄ ዓለም የኔ አይደለም። ሰዎች አቆሽሸውታል። ስቃይ የሚነፍስበት ዓለም አድርገውታል። የመጨቋቆኛ መድረክ አድርገውታል። እና ከዚህ ዓለም ምን ቀረኝ። ከአንዋር የሱቅ እዳ ውጪ ምን ያልከፈልኩት ነገር አለ? አንዋር ከዘመዶቼ በላይ እንደሚያለቅስ እገምታለሁ። ምስኪን አንዋር። ምናልባት ሰማይ ቤት ከሄድኩ በኋላ አንድ ደግ መላዕክ ፈልጌ የአንዋርን ዕዳ እንዲከፍልልኝ እማጠነው ይሆናል።

የሰው ልጆች በርግጠኝነት የማያውቁትን ነገር ወደማወቅ እየቀረብኩ ነው። ጥቂት ደቂቃ ብቻ። ከሞት ወዲያ እጅግ ማራኪ ነገር ቢኖር ነው የሞቱ ሰዎች ተመልሰው መጥተው ምን እንዳለ የማይነግሩን።

ከሞት ወዲያ ምንም ባይኖርስ?
_ ምንም ቢኖር ግድ የለኝም።
_ ምንም ባይኖርም ግድ የለኝም።
_ ትልቁ ጉጉቴ ምን እንዳለ ማወቅ ነው።

ምንም ባይኖር እንኳን ምንም እንደሌለ አውቃለሁ። ምንም የት ተኩኖ ይታወቃል? ምንምን በምን አውቀዋለሁ። ይህ ሁሉ ግድ አይሰጠኝም አሁን። ተሻግሮ የመሄፍ ጉጉት ሰቅዞ ይዞኛል።

ጉጉት፣ ድፍረት እና መሰልቸት ከሞት ወዲያ ሆነው በለሆሳስ ይጠሩኛል።
1· ከሞት ወዲያ ምን አለ የሚለው
ያጓጓኛል።

2· ደፍሬ የራሴን ነብስ መውሰድ መቻል ይማርከኛል።

3· እዘከህ ዓለም ላይ ያለኝን መሰልቸት በአንዲት የሞት እርምጃ መሻገር ጥልቅ ምኞት ሆኖ ያንጠራራኛል።

የመጨረሻ ሰዓቴ ደረሰች። ደውሉ ይሰማኛል። I know it is for me that the bell tools! የህይወት ትርጉም በተቻለ ፍጥነት ወደ ሞት መጓዝ ይመስለኛል። ደርሻለሁ። መግባት ብቻ። ነብሴ ላይ ፈገግታ ተፅፏል። ደውሉ ይሰማኛል።

ቅጭል………..1

ቅጭል…….… 2

ቅጭል…………