ከላይ ከላይ ስታየው የኦመር ካያምን ስብከት ያክል የሚመች ፍልስፍና የለም ፡፡ይሁን እንጂ ፤ የሰው ተፈጥሮ ስሩ ሲማስ ዱሩ ሲጣስ ከዚያ በላይ የተወሳሰበ ነው፡፡ ከቀመቀመህ በኋላ በቅርብ ራስምታት በርቀት ሀንጎቨር ይጠብቅሃል ፡፡

ርቦሽ በልተሽ ከጠገብሽ በኋላ በረጂሙ ታፏሽኪያለሽ፡፡ ላጉርስሽ የሚልሽን ሰው ካልደበደብኩሽ እያለ እንደሚጋበዝ ደመኛሽ ጠምደሽ ትይዥዋለሽ፡፡ ምግብ ያለበት ኣካባቢ መቆየትን እንደ ከባድ ሸክም ትቆጥሪዋለሽ፡፡

ወሲብም እንደዚያው ነው፡፡

እዚህ ሃያሁለት ማዞርያ ሰፈሬ ውስጥ ከሚገኙት ስፍር ቁጥር ከሌላቸው ምኝታ ቤቶች ካንዱ ፊትለፊት የወንዶች የውበት ሳሎን ይገኛል፡፡እዚያ ገብቼ፤ ጢሜን ለመቆረጥ ወረፋ እየጠበቅሁ ወደ ምኝታ ቤቱ የግቢ በር ኣይኔን ኣነጣጥራለሁ፡፡በቀደም ለታ፤ ጥንዶች ወገብ ለወገብ ተቃቅፈው እንደ ብርሃንና እንደ ነበልባል ተዋህደው ወደ ግቢው ዘለቁ፡፡ነገሩን ኣጠናቀው ሲወጡ መተቃቀፉ በቦታው የለም፡፡እሱ እጁን ኣርቆ ኪሱ ውስጥ ደብቆታል፡፡ እሷ እጆቿን ደረቷ ላይ ኣመሳቅላዋለች፡፡ እሱ ለማምለጥ የተዘጋጀ ይመስል ከፊትለፊት ሲጣደፍ እሷ ለማፈግፈግ የተሰናዳች ይመስል ከኋላ ትከተላለች፡፡ወንዱ የልጂቷን ፊት እንኳ የሚያይበት ወኔ ኣልነበረውም ፡፡ ሳየው”ያ ሁሉ ውጣ ውረድ ለዚች ብቻ ነው？“የሚል ግለ-ሂስ ፊቱ ላይ ተጽፏል፡፡ የሷ ፊት ላይም የመሰላቸትና የጸጸት ስሜት ተደባልቆ እንደፓውደር ተለጥፏል፡፡

ምናልባት በዚያን ቀን የተደሰተ ሰው ካለ የምኝታ ቤቱ ኣከራይ መሆን ኣለበት፡፡
በፋርሱ ገጣሚ ስንኞች ውስጥ ያለው የህይወት ርካታ ምድር ላይ ኣለ？ላገኘልኝ ወረታውን እከፍላለሁ፡፡

ከኦመር ካያም በተሻለ ጥልቀት፤ የተፈጥሯችንን ባህርይ የተረዳው ጥንታዊ የኢትዮጵያዊ ባለቅኔ እንዲህ ሲል ተፈላስፏል፡፡
ከማሃ ተድላ ኣለሙ
ዘኢረከባ ይተክዝ ፤ ወዘረከባ ይጻሙ
（እንዲሁ ተደላ የሚሉት ፤የሚገኘው ባለሙ
ባጡት ጊዜ ሲያስተክዝ፤ ሲጨብጡት ማድከሙ፡፡）የሚል ነው ነጻ ትርጉሙ፡፡