እውነቱን ለመናገር ባሁኑ ሰዓት ኢትዮጲያ የት ነው ያለችው ስንል የምናገኘው መልስ ‹‹ካርታ ላይ ብቻ ›› የሚል ይመሰለኛል! ፉከራችን ወንዝ አይሻገር ፣ ቋንቋችን ወንዝ አይሻገር ፣ ታሪክ ብለን የምንኮራበት ታሪክ ወንዝ አይሻገር ፣ ትምህርታችን ወንዝ አይሻገር ፣ ምግባችን ለራሳችን እንደምናጨበጭበው ወንዝ አይሻገር፣ እምነታችን ወንዝ አይሻገር ፣ቁንጅና እያልን የምናቆለጳጵሰው ቁንጅናችን ወንዝ አይሻገር ፣ ዓለም የት እንደደረሰ ከሚደፉብን ዝቃጭ ፊልሞቻቸውና ዜናዎቻችው ያለፈ ትክክለኛ ግንዛቤ የለን ፣ እነሱ እኛ የት እንዳለንም ምን እንደሆንም ከራሳቸው ጥቅም አንፃር ካልሆነ አያውቁን ! ቢመረንም ዓለም ከሚባለው ፈጣን ወንዝ በራሳችን ትንሽ መዓበል እና ስንፍና ራሳችንን አውጥተን አልባሌ ቦታ የጣልን ዜጎች ሁነናል!

እንደአንድ ኢትዮጲያዊ ሊያንገበግበን የሚገባው ጉዳይ እንደሰው መታየት ከምንችልበት ዓለም ዓቀፍ መድረክ እያለን አለመኖራችን ነው!! የራሳችን ቋንቋ ያለን ህዝቦች ግን የራሳቸው ቋንቋ ከሌላቸው ህዝቦች ጋር እንኳን ስንወዳደር እርስ በርሳችን መግባባት የማንችል ፍጥረቶች ! በቅኝ ግዛት ያልተገዛን ህዝቦች ግን በአሁኑ ሰዓት አካላዊም ስነ ልቦናዊም ባርነታችን ቅኝ መገዛትን የሚያስንቅ ህዝቦች!! እዛ ዘመናትን ተሻግረን አክሱም ፣ላሊበላ ከማለት ውጭ እንደትውልድ በኔ ዘመን ይሄን ሰራሁ ብለን የምንናገረው ቁራጭ ታሪክ የሌለን ህዝቦች!

አገራችን የትም ይሁን ታሪካችን ምንም ይሁን ፣ ፣ የምንወዳደርበት እውቀትና ብቃት ፣ የምንፎካከርበት እልህና እኔነት ፣ የምናሸንፍበት ቴክኖሎጅና የሰለጠነ የሰው ሃይል ፣ ሌሎችን የምንስብበት የተፈጥሮም ይሁን ሰው ሰራሽ ጥቅም ላይ የዋል ሃብት ከሌለን…. ሰንኖር ማንም ሰንሞት ምንም ነን!!